Goierriko Hitza

Tankok Kataluniako txapelketa irabaz dezake asteburuan

Ezkio-Itsaso Bi probaren faltan, Ezkioko pilotua lider da sailkapenean, eta 38 puntuko aldea ateratzen dio bigarrenari.

erredakzioa

Kataluniako Karting Txapelketa irabazten duen aurreneko euskalduna izan daiteke Jon Tanko pilotu ezkiotarra. Bi lasterketaren faltan sailkapeneko lehen postuan dago, eta 38 puntuko aldea ateratzen dio bigarrenari. Garaipena ziurtatzeko, ordea, Tarragonako Mora d´Ebreko lasterketa jokatu beharko du asteburu honetan.

Jon Tankok eta M2 Racing taldeak «erabat lotuta» utzi nahi dute txapelketa azken probari begira. Orain arte maila ona eman du Ezkioko pilotuak, eta sailkapenean duen aldea ikusita garaipena lortzeko itxaropenarekin daude taldekide guztiak.

Fisikoki puntu onean

Azken test pribatuetan ikusi ahal izan dutenez Tanko «fisikoki puntu onean» dago eta «ezbeharrik ez bada» behintzat, txapelketa erabat bideratuta utz dezake. Mora d´Ebreko probaren ondoren, azken lasterketa irailaren 14an jokatuko da, Sallenteko zirkuituan.